Monday, June 14
Shadow

成龍收500萬人仔出騷賓客台上自由行被大陸網民恥笑去Cheap場:缺錢? – 香港蘋果日報

成龍曾經話過「中國打個乞嚏都會震動地球」,一向愛國嘅成龍早已北望神州。最近,成龍獲邀去西安登台唱歌,雖然貴為國際巨星,但今次大會冇華麗嘅舞台,反而安排成龍喺一個簡陋到似農村活動求其搭嘅舞台上唱歌,大陸網民見到成龍登台片,紛紛留言恥笑,問佢「係咪好等錢使」!

成龍早前去西安出席達人騷盛典,同場嘅仲有好多噏唔出名嘅藝人如金波、春雷、大胃王紅姐同條子哥等,據知成龍身為重量級嘉賓,今次唱一首歌就可以袋500萬人仔(約590萬港元)。講返當日成龍嘅演出,見佢登上一個乜都冇、僅有一幅LED螢幕作背景嘅舞台,不過冇影響佢嘅心情,成龍依然好開心咁喺台上唱出《國家》兼郁下手仔扮跳舞。

大陸一向主辦方大晒,歌手喺台上唱歌,唔少觀眾可以隨便上台獻花同影合照,而成龍亦融入國情,賓客任意「自由行」,先有兩位打扮似老細級嘅阿叔直衝上台,忽然企喺成龍旁邊影合照,跟住又有一個賓客衝上台獻花,當時有工作人員想攔截,但對方一手揈開工作人員隻手,熱情地衝向成龍,個台跟住就好似「冇王管」咁,觀眾任上任落。

之後又有一個着住藍色西裝又係疑似老細級人物上台,獻完花後直接走到成龍身邊畀Like 。雖然場面極度混亂,對於成龍嚟講只係濕濕碎,因為成龍曾經喺台上唱緊歌時,俾一個和尚兜腳踢埋去,依然繼續全情投入地唱。

唱到尾聲,藍色西裝友又嚟料,拖住一位大媽fans上台,正當大媽準備獻花之際,成龍咁啱唱完,即頭也不回轉身離開,搞到大媽只好望住成龍離開,相當面懵。

睇見國際巨星成龍要喺咁嘅場合唱歌,就連一眾大陸網民都嘲笑成龍係咪等錢使,要喺一個貌似農村搭嘅台度唱歌。

—————————–

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

—————————–

支持蘋果深度報道,深入社區,踢爆權貴,即Like蘋果專題及調查組FB專頁

Leave a Reply

Your email address will not be published. Required fields are marked *